日股升292點，港股升得少，只有40點進賬。恒指升抵5月高位，拉扯一番好正常。
市場注意力，集中喺幾隻國內保險股，國壽（2628）創新高，遲吓就算半年成績表靚靚，股價都已經先行反映，提防獲利回吐。平保（2318）接近新高，但C輪交投疏疏落落，好難搵對象，交投比較多嘅3678，有兩個幾月壽命，槓桿率唔夠7倍，要畀4%溢價則又貴咗啲。中財險（2328）可以睇好，但C輪交投更少，難轉身。
滙控C輪4920：恒指成份股洗過牌，滙控（005）佔指數比重分階段降低，但已經屬於舊嘢，市場唔當一回事，最低140.40元，收140.80元，跌0.30元。未來一段短日子，滙控都會呆呆哋，吼住明日除息後，喺低位買C輪。4920諗得吓，12月初到期，輪價71仙，溢價1.6%，槓桿率19.8倍（有效12.7倍），引伸波幅16.5%。計埋除息因素，隻輪實際溢價2.5%，冇離譜到。

日經P輪2129：日股大升，日經P輪變咗PK輪，2102做咗死火輪王，收3仙，散42%，下月初到期，溢價6.8%，冇得博。
博日股調整，揀日經P輪2129。隻輪12月初到期，輪價11.7仙，溢價7.8%，槓桿率36.4倍（有效11.6倍），引伸波幅22.2%。85球易手，買賣非常容易，睇錯市，手起刀落幾秒鐘搞掂。
章盛