今屆出戰亞運嘅馬會馬術隊騎手早前完成賽事返港，其中六名騎手何苑欣、林立信、吳蓓華、蘇昱軒、梁巧羚、黎嘉怡及馬術隊領隊兼馬會馬術事務高級經理龐雅雯，今日出席馬季開鑼日，接受馬會主席周永健嘉許，表揚佢哋喺亞運會嘅佳績。點解唔見喺盛裝舞步項目奪金嘅蕭頴瑩？原來佢同「馬術公主」賴楨敏，已去咗美國備戰國際馬聯世界馬術運動會。

嘉許儀式特別之處，係將一個紀錄馬術隊嘅雅加達亞運花絮嘅紀念相集，送畀龐雅雯，列席儀式嘅特首林鄭月娥，以及台上嘅馬會董事及行政總裁應家柏似乎都對相集好有興趣，齊齊探頭昅下有乜正嘢。龐雅雯則話呀，香港有唔少具天份嘅馬術騎手，蕭頴瑩呢次奪金，正好反映有優秀嘅騎手同馬匹，加上合適配套，絕對可望爭取佳績。