參選特首比拼理念同政綱之餘，都要比拼一下「幕後玩家」，如果講起葉劉淑儀，相信唔少人都記得佢嗰位「幕後玩家」，專門管理佢facebook嘅職員Eric Chan，皆因早年葉劉嘅facebook上載咗張大腸內窺鏡檢查X光照片，仲話條大腸健康到連一粒瘜肉都冇，點知張相連葉劉個身份證號碼都登埋，搞到Eric要發道歉聲明，話自己嘅嚴重失誤令葉劉構成極大困擾。

事過境遷，八方無啦啦仲乜提起Eric？事緣參選特首嘅葉劉今晚出席自由黨青年團活動，交流自己嘅參選理念時提及，家幫佢拍片嘅職員係人才；至於Eric呢？原來仲做緊㗎，而且仲加咗唔少人工，因為工作量都加唔少喎。之後葉劉講到自願醫保，無端端又用照腸做例子，睇嚟佢對呢單甩轆嘢冇放喺心喎。