昨日港股再次表演無定向風式的波動市，恒指一度升近200點後徐徐滑落，中午收市前只升得數十點，下午回來忽然又來大挾淡倉回升逾百點，之後有玩插水，期指倒跌收市。即市炒家又或交易員應該會感受至深，自從延長交易實施之後，這種挾升挾跌市況經常出現，假如炒家在早市滑落時趁低吸納，下午回升百多點的市況應該會加碼造好，因為以為午前的回跌只是短線回吐，但在買完一輪貨之後，收市前應會後悔，因走勢完全未能符合預期。
其他日子，若不見忽然飄忽市，便會是極度牛皮市，尤其午後至3時歐洲開市之間，假如午飯吃得稍為飽一點，瞓一個多小時完全唔係問題，因為個市大部份時間都係悶局。明年3月將實施第二階段延長交易，在市場怨氣冲天之際，港交所（388）高層應早已被市場人士咒罵不知多少遍，強行實施，只會令市場人士更多怨言。
港股周二大挾淡倉，原因之一是A股回升，不過睇翻Shibor其實仍在衝高位，A股何時能夠正式反彈，也真望到頸都長。

內地持續收緊銀根，連內房股融創中國（1918）都要借近20厘高息發展房地產項目，可見游資已經非常缺乏，有錢的話寧可「放貴利」收巨息好過。在如此水緊情況下，憧憬A股反彈是否有點不切實際呢？還是寄望中央再次放水救經濟，A股方有運行？
如果水緊現象變成常態，內地證券業應該好難捱。內地證券股海通國際（665）今年累跌26%，第一上海（227）跌29%，光大控股（165）亦跌了22%，這些股份前景有限應該是市場共識，散戶如果博反彈的話，應該睇清楚邊類股有機會有運行，內地券商股唔似有。
歐陽風