退隱咗一段短時間嘅前商務及經濟發展局局長馬時亨，噚日亮相教會，以傳教士姿態出現，冇見一排，肥馬精神爽利咗，講嘢風趣咗，完全演繹咗「無官一身輕」呢句陳腔濫調。政府近日忙於應付金融海嘯，財金官員嘅壓力可想而知，佢哋可能都會好羨慕退出唔玩嘅肥馬咁，退一步就可以咁海闊天空。
佈道會嘅現場係九龍城浸信會，題目係《給我多一D情》。打住粉紅領呔嘅肥馬講足兩粒鐘，過千教徒連英超大戰車路士對曼聯都唔睇，走來聽道，就知道肥馬號召力幾大。佢講嘅情，包括父母子女、兄弟姊妹、夫妻同朋友之間嘅情。
先講母子情，肥馬話自己細個讀書好渣，讀到中三仲係成績表滿江紅，被隔籬個師奶當住自己媽咪面前話佢，好彩馬老太冇被個八卦師奶擺佈，並冇打佢鬧佢。到咗中四，肥馬大器晚成忽然好學，於是扶搖直上入到大學。肥馬噚晚特別公開多謝媽咪，畀機會佢自然發展。
跟住講夫妻情，肥馬提到同太太卅幾年嘅婚姻，特別自豪嘅係馬太喺佢失意嘅時候多多支持。記得肥馬啱啱做局長嘅時候就遇上仙股事件，報章頭條登咗佢張鞠躬道歉嘅樣衰大相，肥馬當時好唔開心，全靠太太全力鼓勵，否則隨時已經黯然呈辭，冇機會為香港人服務，亦都冇機會喺呢個佈道會度學人講道。

叫上帝寬恕長毛

第三講係友情，席上最大反應就呢Part。肥馬首先幫好朋友劉千石向公眾交代，話阿石之所以成日開會唔見人，全因為孝順，要返大陸探媽咪。再講到來屆立法會兩大惡人，佢仲好記得長毛曾經喺立法會上展示一對輓聯詛咒佢同唐唐，當時佢頭耷耷，記者可能以為佢冇面見人，查實係為長毛祈禱，叫上帝寬恕佢。
至於新當選嘅惡人黃毓民，肥馬話佢都係基督徒，希望佢可以將愛心帶入議會，肥馬作為納稅人，都會監察住毓民。最後講到兄弟姊妹情，肥馬兩個阿哥一個妹，細個時全靠阿妹煮飯，屋企清貧但係關係不知幾和洽，唔明點解家陣咁多兄弟不和及姊妹爭產。
肥馬嘅太太同仔女噚晚都有捧場，今年6月因為腦血管畸形而宣佈辭職嘅肥局長，話自己已經多咗運動少咗食肥膩嘢，成功搣脂五、六磅咁大把。不在其位不謀其政，有記者請教肥馬點睇近期嘅金融海嘯，肥馬話佢家陣只講心唔講金。

mailto:[email protected]