許志安今日以活動大使身份，去啟德郵輪碼頭舉行嘅香港街馬十公里活動，擔任起跑禮嘉賓。

呢排成日同「十嫂」鄭秀文（Sammi）情侶跑嘅佢，當然落場跑埋一份啦，同場參加賽事嘅仲有江若琳、女子組合AsOne同埋電台DJDonald等。早排同「肯雅徐」徐濠縈一齊去名古屋參加馬拉松比賽嘅Donald，最快完成賽事，安仔就以1小時13分鐘完成。

安仔講笑話自己用龜速完成賽事，比賽期間，大會司儀就話見過安仔同佢啲歌手好友齊齊練跑，大家即刻諗起「十嫂」，安仔就話：「講到好神秘咁，有好多朋友陪過我，有蘇永康，Sammi都有。」

同Sammi跑嗰時威猛啲？佢話？「咁又唔會，主要鍛鍊身體，冇話快慢嘅，不過佢叻啲，我近年先開始練跑。出年唔會參加比賽啦，會叫張衛健接棒，因為佢都要做下運動，費事佢下次個演唱會又做不到『蜈蚣彈』。」

同場嘅江若琳都跑得快過安仔，只係用咗59分鐘就完成賽事，佢話自己由細到大都係運動健將，雖然起初都有擔心自己狀態唔係咁好，不過可以喺1小時內完成賽事都好開心。



爛片界盛事、由本報娛樂版舉辦嘅第九屆「金話梅電影選舉」（GoldenPlum）又嚟喇！請即click入網址投票，喺香港電影金像獎舉行之前選出爛片之霸！
↓↓↓
http://campaign.appledaily.com/goldenplum