今日係諸葛紫岐（Marie）嘅33歲生日，噚日佢公司旗下班藝人，包括黎美言（Winkie）、黃倩婷（Cindy）、曾博君（Rex）、鄭富安（Kenneth）等搞咗個神秘生日P，幫老闆慶祝。

Marie話：「同事本來約咗我中午時份喺餐廳開會，我去到餐廳時一個客都冇，覺得奇怪時，公司同事就捧住生日蛋糕出來，原來佢哋一早將包咗場，幫我提早慶祝生日，嗰一刻真係非常感動！」不過噚日其實都未齊人，因為呂晶晶同莊端兒唔喺香港，所以缺席，但佢哋已預早祝咗老闆生日快樂，仲話返港後會約埋啲同事再幫老闆開P補祝。

Marie話今年係第一年喺香港過生日：「往常生日都在外地度過，估唔到大家有個咁窩心安排，真係感動到講唔到嘢，特別係見到佢哋預備嘅生日禮物，Winkie畫咗幅畫送畀我，係我喺船頭帶領大家喺海中乘風破浪前進，非常有意思！Rex亦特別為我用咗兩日時間，親手整了一盒macaron畀我，上面最特別係有我張相，同埋我心愛嘅麵包超人公仔，好有心思！我點捨得食？」

不過點數，都係Marie老公薛嘉麟被安排做禮物驚喜登場最震撼，薛嘉麟仲錫老婆賀生日，Marie話：「佢哋安排薛生最後入嚟，然後一齊唱歌切蛋糕，好難忘。其實我見到大家一家人咁，又團結，先係我收到最開心嘅生日禮物。」