胡杏兒聖誕宣佈懷第三胎 瞞劇組陀B照返大陸參賽搵銀
蘋果日報 2020/12/25 18:35
胡杏兒李乘德四年抱三聖誕節報喜
胡杏兒2015年與商人李乘德結婚，二人育有兩名兒子，分別是3歲大仔李奕霆（Brendan）及1歲細仔李奕霖（Ryan），她今日聖誕在社交網貼一張在聖誕樹下的單人相，戴口罩托住巨肚，宣佈再陀B，預計BB明年中出世，即是四年抱三。
胡杏兒在帖文提到再做媽咪的感想：「我來自一個有兩個姐姐的家庭，從小就體會到三姊妹的好處，一直覺得如果能有3個孩子會是一件特別美好特別幸福的事。2020年的聖誕節告訴大家，願望成真了。」之後，她回覆《蘋果》：「其實聖誕節都係一個好開心日子，同自己家人一齊，揀喺呢日話畀大家知呢個對我哋嚟講嘅好消息，一直以嚟希望有三個小朋友，當然可以有，好感恩。」問到這一胎是否計劃之內，胡杏兒表示生仔女無所謂，最緊要BB健康，預產期係出年年中。
有身孕的胡杏兒早前返大陸拍真人騷《演員請就位2》，現時已返港安胎，現正家居隔離，預計12月31號出席活動見大家。講到「陀住BB搵人仔」，她稱開工時未有跟劇組透露懷孕的消息：「希望自己冇特權，可以公平公正比賽，最後拎到好成績好開心，BB一直陪自己好開心。」問到陀第三胎有否辛苦，她笑稱好有經驗：「次次陀BB都有工作在身，因為前階段都唔會現肚，可以收埋，都多謝BB好乖，一切順利，有喺大陸做檢查，keep住好安全，順利，第二個仔Ryan仔一直陪住我，即係基本上成個過程好開心，雖然工作上有啲壓力，同普通女士一樣，但係做嘢時係冇影響。」
杏兒老公亦在IG出post公佈喜訊，他多謝太太，讚她是好老婆、好媽媽、好新抱及好生養「Super fertile」，提到她返大陸開工冇向人透露已有BB，不想有特權如常工作，不少女士照顧家庭與工作的典範。
胡杏兒聖誕報喜陀第三胎，BB預計明年年中出世。（IG截圖）
老公李乘德亦分享喜悅，更大讚老婆是Super wife、super mom及super fertile，即好生得。（IG截圖）
二人已育有兩子，大仔Brendan已3歲，細仔Ryan已1歲。（IG截圖）
二人將合組5人家庭。（IG截圖）
胡杏兒早前返大陸拍真人騷，未有將自己懷孕一事通知工作人員，希望不會有特權。（影片截圖）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！