中交建（1800）有國策護航，但上年尾、今年頭，照俾市場掟到阿媽唔認得，家陣集團喺近磅瓣數當中，A、H折讓最大、PB同PE又係至平。
中交建現價7.12元，比A股（滬：601800，折約12.8港元）折讓44.4%。近磅嘅中車（1766）同中鐵建（1186），折讓35%，中鐵（390）44%，中交建A、H股折讓最大。而專業預估中交建今年0.65倍PB，上邊行家，今年預估PB，0.74倍到1.5倍不等，又係中交建最平。
仲未止。中交建2006年上市以嚟嘅平均PB，兩倍樓上，就算用最近5年平均，都講緊1.05倍PB，中交建今年PB，又平咗近40%。而今年頭，中交建再重新申請旗下疏浚業分拆上市，連埋呢壇製作潛在增值，中交建PB應該仲低。
睇中交建網站，今年以嚟，唔少海內外中標消息。好似上個月22號發佈，旗下中國路橋同剛果簽署嘅合同，金額講緊折約151億元人仔，另同月23號發佈中標長春鐵路工程，合約金額10億元人仔。