新春期間喺西貢被「攝」喺兩間祠堂之間嘅唐狗黑妹，引起愛狗人士關注，行政會議新貴兼中大校長劉遵義係其中之一。劉遵義喺中大總共養咗三隻狗，其中兩隻大約有20歲，相當於人類100歲。
劉遵義噚日同記者新春團拜，同記者講到佢養嘅三隻狗，其中兩隻唔多願郁，分別係叫Dora嘅黑色唐狗，同混種狗Lulu。原來係前校長高錕同李國章在任時養落，到離任時就留低畀下任校長接手。至於最年輕活潑嘅係一隻金毛尋回犬、四歲半大正值壯年嘅Muji，至係劉遵義到任先至搵番嚟養。佢話三隻狗都係中大狗，相處融洽，所以佢明年中約滿後，唔會帶走，會繼續傳統，留畀新校長繼續照顧喎。

校內大樟樹又成難題

睇番劉遵義任內呢幾年，中大風波不絕，退休在即，佢話冇遺憾，做六年已好夠，功過留番畀其他人評論。以一個經濟學者加入行政會議，佢話自己最冇政治力量，煲呔係因為經濟背景先搵佢。
𠵱家中大搞緊擴建，拆唔拆烽火台仲未傾掂，劉遵義話諗到唔使拆嘅方案，但工程費就要增數以百萬計；近排又計劃拆校巴站附近嘅兩幢教職員宿舍，用嚟興建新教學樓，但地盤內嘅一棵大樟樹又成為校方難題，原地保留要用多成千萬，移植都要用百萬，佢話會諮詢吓先再決定點做。