一年一度嘅《歡樂滿東華》今晚喺將軍澳舉行，今年嘅嘉賓陣容都有驚喜，除咗有80年代嘅東華常客楊盼盼，佢將同四位應屆港姐演出之外，有一段時間冇喺香港出現嘅馮寶寶，亦有出席支持！

好耐冇見嘅BoBo姐，今晚着住一條黑色嘅V領連身裙，配上一頭銀色頭髮，佢話今次係專登撐盼盼姐，阿姐話要坐埋去BoBo姐嗰邊，事關當年大家都有份拍《楊門女將》：「佢係我個仔㗎，楊文廣！」BoBo姐即刻叫咗聲「娘親」兼指一指盼盼姐話：「呢個係妳嘅新抱嚟喎！o依家我叫佢做楊院長，佢訓練一班手下，又係做啲難度高嘅嘢，所以我今次真係支持佢返嚟。」」

講到當年有冇做難度高嘅事，BoBo姐話：「其實好細個就做高難度嘅嘢，係我教盼盼！」之後螢幕播咗一啲當年BoBo姐拍戲嘅片段，梗係唔少得《楊門女將》，BoBo姐又話：「我真係要多謝Liza，係佢點名要我做佢個仔，所以之後我永遠都叫佢做娘親，因為做人個仔，娘親畀封利是都大啲！」跟住又講到喺83年同劉德華合唱折子戲，BoBo姐笑笑口話：「嗰陣係我第一次做番女人，我幾驚德華冇乜感覺，當日我為咗吸引佢，搽咗好多香水，點知佢都冇感覺，幾肉赤呀！」

早前盼盼姐拍戲意外被燒傷(新聞連結： https://bit.ly/2PvMjXy )，BoBo姐話：「其實我今次嚟，除咗可以為支持吓善事之外，盼盼要去台灣做一個大手術，所以要嚟支持佢！」盼盼姐睇完4個港姐學生表演之後，即場自薦表演，結果喺王賢誌嘅支持下，佢喺繩上轉圈，結果額外籌多60萬善款，果然寶刀未老！

BoBo姐接受訪問話嗰陣盼盼姐拍戲受傷專登飛去探佢，o依家佢已康復咗好多，希望今次手術順利，希望佢多啲休息，早點康復！

精選娛聞，喺晒《娛果》
http://fb.com/appledailyent