另外兩位優秀畢業嘅警員洪焯銳同姚倩珩雙雙獲頒銀笛嘉勉,洪焯銳更拎埋代表最優秀畢業警員嘅薛富盃。呢兩位新紮師弟、師妹原來以前都係做銀行工,都係覺得返銀行好悶,所以把心一橫轉工。洪焯銳話警校教官好有愛心,唔係鐵面警官,有次佢哋一班學警操咗成日全身散晒,阿sir竟然拎咗幾十碗由自己太太親手煮嘅糖水畀佢哋,成班人感動到喊咁滯。
近日警隊俾人鬧到暈,「警字兩個口」形象開始深入民心,呢幾位警隊新丁異口同聲話唔擔心警隊嘅形象會受淫照風暴影響,又話警隊一直都與時並進面對新挑戰。八方聽佢哋咁講,好似之前有台詞背咁,警校啲教官果然教導有方。