37歲嘅美國單車手岩士唐，喺上周六展開佢闊別4年嘅環法單車賽，呢位99至05年間7奪環法嘅車手仍然寶刀未老！岩士唐喺體力上可以同班後生仔鬥之餘，周一佢仲憑經驗喺第3站突圍而出，總成績由第10位急升至第3，我求大俠都要高呼：「『車神』返嚟喇！」
環法第3站由馬賽鬥到拉格朗德莫特，全長195.5公里，對「車神」嚟講真係「碎料」；佢全程同總成績排第1、2位嘅瑞士車手簡索拉拿、英國車手東尼馬田鬥到尾，勁堅！岩士唐今站最厲害係深明風速對車手有影響，即時改變策略緊跟主車群，最後以第19名衝線，但時間同今站冠軍英國嘅卡雲迪殊一樣。

賽後謙虛　王者風範

其他原本喺總成績排前10嘅車手就冇咁醒，好似之前排第2嘅西班牙車手干達度爾、第6嘅美國車手利菲摩爾，今站策略錯誤，總成績分別跌落第4同第10；岩士唐就急升至第3，只落後榜首嘅簡索拉拿40秒！岩士唐賽後多謝隊友「護航」，同埋成功阻止其他車手突圍；仲話今站攞到好成績，都係憑經驗同少少運氣。
我求大俠不禁讚嘆「車神」講嘢有氣派、風度，係年輕車手好榜樣！不過客氣唔代表冇鬥心，岩士唐好認真咁話，佢確實想攞番件象徵領先嘅「黃色戰衣」，仲講「NeversayNever！」昔日王者霸氣重現眼前！不過，「車神」都係人，今站佢因為冇準時喺早上7時報到，被罰92美元（約718港元）；實情係岩士唐掛住同「粉絲」簽名影相先冇報到，難怪「車神」咁受歡迎啦！