改裝車:
重裝甲Prado日爬千公里
鍾意登山涉水的朋友,一定鍾意揸住架四驅車呢度去嗰度去,就好似車癡馬大立,曾經揸車由希臘的奧林匹克走到去中國的萬里長城。今年在農曆新年期間,他又再準備揸車上雲南,由於每日平均要行走幾百甚至過千公里路,所以便把一架97年版的PradoLandCruiser90愛驅重頭改裝,令它適合作長途旅程。
記者:曾順珍 攝影:陳偉強
和馬大立一起揸車由飛鵝山走到清水灣拍照,沿途他揸得極慢,很難相信一架改裝得有型有款的Prado,竟然以每小時五十公里速度走在西貢的山路上,他解釋話已怕了被警察抄牌。雖然這架Prado是97年版本,但保養得極好,添置的補品很多,全部都是馬大立在農曆新年期間到雲南旅行所需,例如為了應付崎嶇的山路,將車身升高了50mm,全個車底連車尾、油缸,用了四塊DAKAR鋼板作保護,又加添兩個差速鎖,令架車成為一架真正四輪驅動的Jeep王。
■馬大立話每架車都要改裝,因為他認為齋車會「好肉酸唔揸得出街」。
由於到雲南途中會上河流溪澗,所以馬大立在車身上加上一個防水裝置(象鼻),令河水不會倒流入機件。為了應付長途旅程關係,它在車頭和車尾都加上ARB和DAKAR泵把,咁就唔怕車頭車尾受嚴重碰撞。
就連車邊都配上COBRA腳踏,除方便踏上車廂外,還有防撞用途,確保爬山時不會被旁邊的石頭陷凹車身。車尾的樓梯都是DAKAR的鋼梯,還有防跣功能,方便擒上擒落,車頂亦裝有一個好輕的鋁金屬架,以便擺放所有日用品。
■舊版豐田LandCruiser外形剛強,比新版有霸氣。
在山區路上,照明系統變得極為重要,馬大立除了在車頂上安有一排霧燈和遙控燈外,更在車頭加裝一對日本HID射燈,每盞火力足有7盞家具用的小太陽燈的威力;車尾樓梯上亦裝有一盞明亮的後波燈,可以在晚間清楚看到車後事物。
「要揸車到大陸旅行,一定要搵一架馬力大嘅車,就好似3000cc以上嘅Jeep,因為每日行最少幾百至一千公里路,馬力細嘅車就吓吓要谷盡副偈,好傷㗎!另外要裝上大泥擋,咁啲細石仔就唔會咁易打到車尾。當然要帶埋接收能力強嘅對講機啦,因為要跟其他同行嘅車保持聯絡,方便照應嘛!」
OME避震連升高 $12,000
DAKAR底板(4塊) $11,100
4×4Engineering防傾桿(2條) $7,000
SFW1合金胎軨 $14,000
airtec防水裝置 $3,200
KOITOHID射燈(一對) $9,500
ARBSAHARA頭泵把 $11,800
DAKAR尾泵把 $4,800
COBRA車身腳踏 $7,800
AIBA行李架 $7,500
DAKAR尾梯 $4,200
IPE後波燈 $780
■因為要登山涉水,所以馬大立為呢架Prado加裝了鋼鑄底板及防水裝置。
特長象鼻
■安了這個「象鼻」裝置,在水中行走時便不怕倒流。
鋼泵把
■車頭裝上鋼質泵把連強力照明燈,有型又有實際用途。
引擎氣泵
■車頭引擎內還有氣泵裝置,方便中途增加或減少胎氣。
中置遙控燈
■車頂上一列霧燈以裝飾為主,中間一盞是遙控燈。
■四四方方的車尾再加上多項四驅補品,令架車型上加型。
輕磅鋁架
■載物用的頂架以鋁金屬製造,同時有減磅效果。
防跣尾梯
■很少尾梯會有防跣功能,這條DAKAR尾梯上的每級都有防跣質料。
後波燈
■梯上還附有一盞後波燈,令駕駛者更易睇清楚後方事物。
耐用泥擋
■馬大立話呢套大泥擋夠耐用,幾年都唔使換。
呢部超級越野Prado(3400cc,V6引擎)唔單止注重外表,其內櫳設備亦配合車身裝置,實行內外合一,應付過千公里崎嶇之旅?NoProblem啦!
桃木改碳纖
■原本的桃木裝置都被換上碳纖,更配合全車四驅味道。