當年今日
關於我們

飲食人誌:日本師傳中東打工
搵到錢無碇使為靚女留港發展

蘋果日報 2003/08/20 08:00


「一個唔鍾意讀書嘅人可以做咩?搵錢。我成日唔返學,考試照樣及格。當年後生,有點自負,覺得讀書無用,見媽咪開小旅館咁厲害,我就唔讀書去學做廚師。」
於是這位京都人,喺當地跟了一個日本很出名的師傅,十五歲那年,Hilton酒店來舖頭揀蟀過美國,加藤被揀中。
「阿媽聽到好開心,搵多啲錢,好好好……」就這樣一個十五歲還未成年的後生仔,展開了出外闖蕩的生涯。
槍林下照煮菜
喺美國留了兩年半後,加藤被派到中東工作。由於酒店要保障佢嘅人身安全,就算放假都唔准出外玩。
「出去飲酒又唔得,去玩要搭飛機去隔籬個國家,放假就喺酒店瞓覺。錢係搵得多,但好悶,無自由。我哋原本有五個人一齊去,半年後,三個留低,我同另一個選擇回美國。留低嗰三個,之後見番佢哋,嘩,成身都係金!」
■1983年加藤與人合夥在海港城開了藤井日本料理,當時屬於非常高級的料理店。



「滯留」香港之因
回美國又留了兩年多,之後返過日本工作,1979年被邀請來香港,做水車屋嘅「開國功臣」。「原本Contract簽兩年,我同老闆講,兩年後一定要走,但點知無走到。點解?因為人生有快樂,有位靚女出現。」
當時嘅香港識日本話嘅人唔多,一個人不免孤單寂寞,遇上呢位靚女識講日文又啱傾,於是師傅就唔捨得走。
其後,愛情故事完了,加藤在香港有他的事業,認為「男人,事業最緊要」的他,就更加不想回日本,再加上現在他身邊有四位徒弟。「𠵱家我五十多歲,有想過退休時返日本,但係點都要等佢哋成材我先至走。」
流水豆腐冷麵$75
預訂至有得食
流水素麵屬頂級麵條,麵身較幼,是江戶時代著名茶道人利休,在茶懷石料理所用的麵。吃的方法是以竹筒連接山澗水,素麵隨山澗水流過,客人用筷子夾起便往口裏送。由於店舖並非在山澗之旁,所以師傅便將之改良為「靜態」的冷麵。豆腐是自家製的,用了牛奶、忌廉、豆漿製成,味道特別,口感軟滑。亦由於豆腐是自家製,不能久放,要嘗這款冷麵,必須預訂。
蘋果清澄冷麵$65
「清澄」是日本漢字,意思是好靚、高貴,果然麵條如玻璃般透明,如水晶般清澈。蘋果切碎,並與清酒和砂糖一起煮,吃落口有淡淡的酒味。醬汁則用了白麵豉、豉油、甜酒、黑芝麻、醋、辣椒粉,味道較濃並帶點辣,與味淡的清澄都是絕佳的配搭。
食客兩句


傳統款式
山薯冷麵$75
無論是用料和配搭,都是非常傳統的日式食法。不要以為麵的頂部放了一隻荷包蛋,其實白色如蛋白的物體是山薯,是一種日本特有的植物,將之刨成如糊狀,而中間打了一隻鵪鶉蛋。麵條用了赤麵,亦即蕎麥麵。將山薯和鵪鶉蛋與冷麵醬汁攪勻,再把麵條逐箸逐箸蘸點,只覺麵條奇滑無窮,味道清新。
冷烏冬$40
用上四國頂級乾烏冬,麵身較扁,與麵身圓潤的水烏冬相比,口感更滑較彈牙。師傅說要令乾烏冬更爽口,飛水後需要加少許鹽。由於烏冬的味道較淡,所以醬汁特別用了味較甜和濃的溜溜豉油,再把薑茸與醬汁攪勻,那烏冬便充滿清新的薑味,特別開胃。
蟹子沙律冷麵$65
來自九州的拉麵,通常是熱食,估唔到冷食一樣咁好味。把醬汁直接淋在麵上,使酸甜的冷麵汁慢慢地滲入麵條每一部份,然後夾起細束麵條、蟹子、蟹柳,一併放入口,拉麵煙韌,蟹子爽口,蟹肉鮮甜,三種不同口感夾雜在一起,美味指數比熱食的更高。
綠茶冷麵$35
各種冷麵中,綠茶冷麵可算是最清淡的一種。吃這道冷麵,除了要慢慢淺嘗綠茶的味道,也要懂得欣賞師傅所做的醬汁。雖然醬汁主要用料同是豉油、甜酒,但每種醬料的比例卻是考功夫之處,只要稍有不對整個醬汁就搞垮。看似簡單的冷麵,卻是最考師傅手勢。
第一食事處
地址:觀塘道474號地下觀塘工業中心第一期D舖
電話:24988905
營業時間:11:30am-3:30pm;6:00pm-11:30pm