【新增影片】
對於傳統新界上車盤沙田偉華中心2房單位都升穿「6球」，經濟學家關焯照認為：「啲人盲上車係咁㗎啦!無辦法，佢覺得可以負擔，又可以搵到個交通咁方便，位置上差唔多是該區最好，行幾步路就係火車站。呢個時勢，癲繼續癲！」

3年前金融管理局總裁陳德霖一句「600萬以下的樓，我哋才叫做上車盤」，今日是否要重新釐定，關焯照回應：「上車盤門檻一直調升，無上車盤㗎啦，呢啲你之後望返，一冧就車毀人亡盤。唔知升幾多，而家係泡沫入面，無得估，癲繼續癲，但爆咗之後，就大鑊。但呢個位升十幾二十個巴仙，你真係吹佢唔漲。當年好低位，低過而家水平，我都話應該爆啦吓嘛，但唔爆。我上年一路被人唱，我轉軚睇好，但睇好都覺得癲。癲，有樣要明白，泡沫係非理性期望入面不斷孕育，直至到爆，你先知死。唔係當年東京泡沫點會爆成咁。好多人而家都覺得唔會跌，就算我而家都覺得唔會跌。問題是好多措施扭曲市場，金管局將按揭鍊死咗，市場只有兩種人，上到車同上唔到車，上到車嘅人已經接受壓力測試，將來應該無事。上唔到車就住劏房。」

樓價幾時爆？關焯照續稱：「當市場畸形發展，就有畸形價格出現，我唔會估佢幾時爆，無意思！而家入得市，夠膽入去，已做壓力測試，有調查顯示入市嘅人俾超過一半首期。有好好實力嘅人入市，或者父母好多錢嘅人，入得市嘅人係好優秀，香港大有人在。」

蘋果財經，關心你飯碗
http://fb.com/appledailyatm