奧格斯堡隊長丹尼爾拜亞喺星期二球隊以1:0小勝RB萊比錫嘅德甲聯賽下半場比賽中，向住對方教練夏辛侯迪做不雅動作，賽後夏辛侯迪拒絕同拜亞握手。雖然當時拜亞嘅不雅動作逃過咗球證法眼，事後又喺個人社交網頁道歉，但德國足總星期三都係進行調查，最後決定判罰拜亞停賽一場同埋罰款20,000歐元（約18.5萬港元），即係話拜亞將會錯過嚟緊星期日奧格斯堡作客史特加嘅德甲聯賽。