谷戰次數剩番越少，方嘉柏心中團火就越紅，卒之呢晚戰至第七場畀佢以「方程式」再下一城，強勢創造谷草九連勝佳績，而「方程式」之前連贏兩場一哩後，增程首戰1800米兼換何澤堯，照樣順利添食，並以三連捷身份捧走法國賽馬會盃，上年此賽憑「自由式」奪勝之小方，亦告蟬聯呢項錦標。
「方程式」馬主李麗雯繼前仗捧五陵會鑽禧挑戰盃後，又一次親身風騷地捧盃，反而上仗獲勝非盃賽，咁啱李麗雯當晚冇出現，可見她與盃賽特別有緣。
「方程式」之前未跑過二班賽，亦未跑過1800米咁長，不過擅於計數之落飛黨，卻一於少理，閘前將佢位置打到着綠燈開跑，而此駒獨贏臨場亦一度受巨額過關影響，臨尾至回番上7.6倍開跑，順利贏馬，落飛黨袋袋平安！同場最令人失望嘅反而係幫「方程式」贏開之潘頓，佢騎一檔馬「勁飛翔」被捧成大熱，跑來卻冇段好睇，枉費馬迷真金白銀撐佢！