【現代月老】成功撮合余德丞與周秀娜？馬天佑話等佢哋自己講
蘋果日報 2019/09/18 16:14
孫慧雪PANDORA馬天佑
（攝影：馬建華）
馬天佑今日到商台宣傳新歌，被指是現代月老的馬天佑，自誇每逢由他撮合的情侶都會長相廝守：「我都好準，有100%，圈內圈外都唔少朋友經我介紹，而家都好幸福，我眼光都好準，又好想身邊朋友幸福，我會先了解佢哋性格撮合。」有指他撮合了余德丞與周秀娜，他大呼冤枉，純粹介紹他們認識，但日前他們首度貼合照，疑似是公開戀情，他尷尬地說：「等佢哋自己講，我唔代講，我就覺得佢哋唔襯，唔好破壞我保持100%（撮合）紀錄。」身邊不少朋友都提議他開設婚姻介紹中心，問到他會否考慮？他說：「睇吓有冇人投資。」
孫慧雪今日到商台宣傳第二首新歌，早前她錄了囝囝唱自己的新歌片段，並放到社交網站中，受到不少網民讚好，她說：「之前公司嘅網劇去我屋企拍攝，囝囝就臨時上咗鏡，跟住好多人覺得點解兩歲做得咁好，噚日返到公司，好多導演走埋嚟問我可唔可以畀囝囝拍嘢，我話唔好啦，啱啱開學好大壓力，又要忙住報下年K1。」阿雪謂囝囝還在適應學前班，又指他每朝返學都不肯出門，放學又爆喊：「我明明見佢嚟學校玩得好開心，放學見到我就喊，應該係扮好慘。」
而樂隊Pandora今日到商台宣傳下月推出的專輯及音樂會，他們透露今次開騷各成員都有份投資，但金額不大，如果門票能夠售罄，便封了蝕本門，他們表示開騷並不是着重賺錢，最主要想跟歌迷分享音樂。由於開騷日子是在星期日，提到會否怕有公眾活動而有所影響，他們說：「都有考慮過呢點，有諗過係咪要延期，但門票已經售出一部份，所以希望到時唔受影響，如果有任何變動，到時再公佈詳情。」
採訪、攝影：馬建華
孫慧雪因近日要忙做宣傳，故未能帶囝囝返學。
將於下月開騷的樂隊Pandora，表示開騷主要想跟歌迷分享音樂。
馬天佑表示經自己撮合的情侶，都會長相廝守。