薛家燕主演嘅新劇《燦爛的外母》今日舉行拜神儀式，林嘉華、黎諾懿、湯洛雯、姚子羚等均有份演出。而最令人感意外，係久違幕前嘅「七公主」成員沈芝華同馮素波都有份客串。

家燕姐話今次係三人相隔50年後再度合作，對上一部戲就係1967年嘅粵語片《七公主》，家燕姐話﹕「今次二家姐（沈芝華）返嚟睇大家姐（馮素波）演唱會，又會捧寶珠（陳寶珠）場，呢段時間入嚟客串吓，捧吓我場，都係一次經典合作。」

沈芝華表示多年冇拍戲，自己都有啲驚，但馮素波同家燕姐即係爭住要做保母同經理人，馮素波更建議公司搵二家姐去訓練班傳授藝人北派粵劇。家燕姐透露一直有唔少娛樂公司希望搵「七公主」一齊登台，可能各有各忙，至今未能成事。

此外，黎諾懿同湯洛雯喺新劇中飾演一對情侶，兩人會有唔少床戲，更被人誤會玩sm，諾懿笑言希望該角色可以承接「賤Han」嘅人氣。