賭王同十姑娘可能係關係最特別嘅一對兄妹，澳博噚日喺澳門舉行股東大會，同一時間十姑娘就喺香港打對台，開記者會介紹自己個新網站。不過賭王抱恙，噚日冇現身，「遙控」四太梁安琪做代表，另一「拍乸」鄭裕彤則暫代主持大局。四太強調賭王只係有少少唔舒服，仲喺記者面前打電話畀賭王，以示賭王冇大礙。
澳博另一大股東霍英東生前冇出席股東會，二仔霍震寰噚日突然現身，佢輕描淡寫話，因為老父成立個慈善基金會揸住唔少澳博股票，佢嚟睇睇好正常，對上市就冇特別意見。十姑娘方面，佢點解唔妥九哥眾所周知，潮流興上網，佢亦設立咗個網站，詳述反對澳博上市前因後果。佢話一日未搵番本股東名冊，「上市唔係咁易。」十姑娘歡迎網友詢問澳博問題，佢盡量解答，網址係www.hoyuenki.com.hk。