「蔡神仙」蔡約翰今季做練馬師冠軍，基本上亳無懸念，由季中開始，他所起用嘅騎師變得多元化，經典例子數到今季重來客串嘅李寶利，因為墮馬受傷，前陣子成績低迷，估唔到「蔡神仙」雪中送炭，彈咗隻「開心遊戲」畀呢位意國型男爆24倍WIN，幫佢提升番信心。

李寶利交到貨，之後再幫蔡神仙贏「天下為攻」同「常豐裕」，有殿堂級練馬師力撐，李寶利梗係想繼續合作，今日（11日）第九場三班1400米隻「開心遊戲」對佢意義重大，不過佢分身乏術，一早應承苗禮德出策「人強馬勁」，君子一言，口頭承諾都要尊重，想騎「開心遊戲」唯有下次。

「開心遊戲」全新配搭交俾祈普敦執韁，小祈同李寶利一樣，到季中先吸到「仙氣」，獲蔡神仙垂青，亦好快就交出到成績，憑「秘密武器」贏出騎練第一場勝仗。

小祈話二人從未深入交流過，直至季中喺晨課先開始熟悉對方，今期小祈策「駿明珍寶」、「鐵男」同「開心遊戲」合共3匹蔡廐馬，有表現嘅話，合作肯定陸續有來。