前晚內地娛樂圈及網友瘋傳某天后喺北京平谷吸毒被抓，呢名爆料網友喺微博寫：「娛樂圈真是不太平，有一位大牌天后吸毒被抓，能不能被媒體曝出就要看公關能力了。」消息一出引發網友關注，王菲、那英、張曼玉、趙薇同張惠妹等天后即成議論人物。
噚日阿菲經理人陳家瑛發聲明強烈否認，聲明話：「就近日網站傳聞有『天后』涉嫌吸毒被捕，媒體未經核查事實便隨意以本公司旗下藝人王菲的照片作相關報道內容刊登，此舉實屬惡意攻擊及誹謗，嚴重誤導讀者。請各媒體自律保護新聞行業的專業操守不要肆意傳播謠言，並立即停止這種具有影射性的不實報道。」

陳家瑛發聲明否認

阿菲老友邱瓈寬話：「𠵱家阿菲好有規律，晚上10點左右就上床，朝早6點就起身唸早經，點會發生呢啲事，今朝我將呢個傳聞當笑話講畀佢聽，佢都係一笑置之，至於那英就喺加拿大，肯定唔關佢兩個事啦！」
王菲另一好友馬葭接受記者訪問時，佢都斬釘截鐵否認：「胡說八道，怎麼可能！剛還聯繫呢。」
而一位叫下午茶9嘅網友，噚日貼咗一張王菲同隻貓嘅合照出嚟。而趙薇友人噚日凌晨兩點就爆佢同女性友人去消夜，睇嚟都係想話畀人聽佢冇事。
撰文：馮仁昭