今晚八場谷草賽事使用A賽道，現時的場地指數是2.72，掛牌好至黏地，另外，如天氣情況許可，馬會將按計劃在第4場後進行壓地。睇番上季5月8日谷A欄賽事亦是在雨中作賽，當晚頭馬除了「無敵駿駒」走二叠之外，其餘全部都係沿途貼欄慳位，跑法上前置馬佔盡優勢，「無敵駿駒」、「彪形好漢」及「喜寶駒」都係放頭帶到，另外「好精伶」、「寶正勁」及「正紅旗」就守前領馬之後貼欄包廂位建功，不過值得留意尾兩場分別由「自由式」及「魅力心」貼欄後上衝贏，提防去到尾段場次形勢會逆轉。今次賽事，尾場「自由式」正是於上季5月8日谷A欄變化地贏馬，今次排四檔且被編在尾場，估計可如勝時一樣沿途守貼欄位置留力，入直路憑後勁衝贏對手。