【肥咗定有咗】傳太太孕味濃 古巨基疑惑:我對佢唔係好了解
實名制古巨基
古巨基今日推出新碟,噚晚喺油麻地一間冰室舉行發佈會,並即時獻唱新歌。事後佢表示呢類冰室好正,好鍾意呢啲地方:「入行之後,我買外賣多,我好鍾意食雜扒、紅豆冰,不過近排古太(Lorraine)好管住我飲食,因為我肥咗少少,佢話我要出碟、做宣傳、開騷、明年又開part 2,所以佢嚴格管制我嘅飲食。」
基仔明年4月再喺紅館開演唱會part 2,對於政府考慮修例打擊黃牛黨,基仔話:「我覺得要諗一個方法去打擊呢件事係啱,不過點樣執行,大家就要傾一傾,我唔知實名制點樣進行,要花時間去諗嗰個售票模式,要定得清楚啲。」
不過基仔好友黃子華就唔同意實名制,認為此舉會侵犯私隱,基仔話:「呢個就係我所講,到底要點樣執行實名制,大家要傾,到底可唔可行。」會唔會考慮減少內部認購嘅數量?佢話:「我好多(飛)已經供應番出嚟,我唔贊成絕望座位表。」
另外,有報道指古太孕味濃,問到基仔係咪做爸爸?佢未有否認,只係話:「等我問下佢先,我對佢唔係好了解,我哋喺屋企好少傾偈。」
精選娛聞,喺晒《娛果》
http://fb.com/appledailyent