17:32更新

連銀孤納比都搞唔掂，試問身為徒弟嘅簡拿華路又點會搞得掂？由大簡帶領嘅國足禮拜一出戰中國盃季軍戰，全場踢到冇呢神氣之下，以0:1不敵中亞球隊烏茲別克，連續兩屆比賽都係得殿軍，三屆中國盃法定時間未贏過，認真羞家！

大簡帶領國足第一戰即失利，喺中國盃四強畀泰國隊打爆，新面孔好似董學升、高准翼表現都係一般般，比賽之後仲惹嚟大批不滿嘅球迷包圍國足隊巴，要求國足盡快「解散」。大簡形容自己唔可以係一兩日之內變出魔法，要求球迷耐心等候，但國足今場對烏茲別克都係冇咩起色，繼續令人失望。

相對迎戰泰國嘅比賽，大簡今次嘅排陣比較進取，兩大前鋒董韋世豪同埋董學升都正選出場，加埋譚龍組成三叉戟，勢要挽回面子。後防上面亦都用咗唔少國家隊經驗唔多嘅球員，好似傅歡、李昂咁，但用新人唔代表有新氣象，國足上半場踢到冇呢神氣，一個威脅攻勢都冇。

即使攞到控球，但往往喺中場出現誤傳嘅情況，加上守轉攻速度極慢，國足完全組織唔到似樣嘅進攻。喺33分鐘佢哋仲畀睇低一線嘅烏茲別克攻破大門，國足中堅高准翼解圍失誤，效力俄超羅斯托夫嘅烏國快翼蘇梅洛度夫右路力壓國足守衛殺入禁區，超窄角度射破顏駿凌，領先1:0。

先失波嘅國足越踢越急，36分鐘前鋒韋世豪喺右路粗野從後攔截烏國中場舒克洛夫，好彩球證手下留情，只係向佢出示黃牌。但韋世豪仲係好唔服氣，對住球證破口大罵，反觀畀佢鏟中嘅舒克洛夫就相當慘情，疑似骨折要由擔架抬出球場。

下半場國足依然冇咩起色，最尾輸0:1再一次喺中國盃墊底。中國盃自2017年起開始舉辦，國足喺第一屆嘅季軍戰憑互射12碼擊敗克羅地亞，之後一場都未贏過，今次更是連續兩屆在這項賽事墊底，相當不濟！

14:50更新
中國隊正選陣容（4-3-3）：
門將：顏駿凌
後防：傅歡、高准翼、李昂、張琳芃
中場：何超、吳曦、張修維
前鋒：韋世豪、董學升、譚龍

中國盃將於今日上演決賽及季軍戰，首次季軍戰東道主中國鬥烏茲別克一戰將於下午3點30分開波。上仗中國爆冷以一球不敵泰國，表現已受國內傳媒批評，是役料暫代主帥簡拿華路排出的正選將有不少變動，全力爭取三屆中國盃以來的首場勝利。

上仗為大簡接任中國隊教練一職的首場比場，正選陣容排出過去中國隊極為少用的4-4-2鑽石型陣式，並安排了嵩俊閔、張稀哲，以及王永珀等技術相對較好的球員上陣，希望以地面組織進攻。可惜，卻反而被泰國反客為主，若非泰國隊把握力一般，中國大有可能大敗。

大陸傳媒賽前預測，預料大簡將在正選陣容作不少調動，估計會放棄4-4-2陣式，另外可能亦會派上五名95年出生的球員，包括高准翼、劉奕鳴、何超、張修維，以及韋世豪正選上陣。值得一提，三屆中國盃中國所踢的5場比賽，尚未有一仗是成功在法定時間內贏波，且看今日能否打破宿命。

而客隊烏茲別克首戰不敵實力有差距的烏拉圭，但今仗面對老對手中國，定必全力爭勝。隊內以一眾有份出戰亞洲盃的成員為主，前鋒有效力俄超羅斯托夫的蘇梅洛度夫，中場亦有隊長效力上海上港阿密度夫在陣。而烏軍現時的教練古柏，過去執教國際米蘭時就曾與球員時代的大簡合作，而古柏就指大簡是個好球員，但作為教練的話仍然不少地方需要加強。

------------------
《蘋果動新聞》4月訂閱新世代
⇛立即免費登記： http://bit.ly/2TzFz0K
--------------------
星期一至五晚上10點半，《動腦Q》Let's Q the money！
⇛即睇點贏錢： http://bit.ly/2UmydKy
--------------------
【BFB皇者領隊團體大合戰】現正接受報名！快啲組隊參加，挑戰盃賽，贏走豐富獎品同專屬獎勵！
http://bit.ly/2XRRSF9
--------------------
《體蘋果》陪你睇波講波 https://www.fb.com/appledailysports