《還珠格格》嘅台灣作家瓊瑤，最近推出創作50周年《瓊瑤全集》新版，佢一班愛將《新還珠格格》家族，同埋新劇《花非花霧非霧》官方微博，噚日就特別錄製咗一段視頻，幫佢推介呢套書，搞到佢鬼死咁開心，個微博仲上載咗好多珍貴合照。

好似其中有一張係當年第一代嘅「還珠格格」，趙薇、林心如同范冰冰，有晒日期攝於99年台灣，當時3位女角都一臉稚氣，趙薇嗰副紅色眼鏡，真係夠晒娘！嘩！再睇下短髮嘅范冰冰，嗰條印花長裙，驟眼睇仲以為佢大肚添呀，同依家人稱「國際范」嘅佢，真係相差甚遠囉！最順眼都算係林心如，以前同依家都好似冇乜大分別！