前排特首林鄭月娥參觀工聯會，「順便」幫工聯會做埋「我係特首」接線生，真係唔話得。今日佢就參觀番醫療輔助隊，不過唔落場喇，啲粗重工夫由得職員做算喇，頂晒籠開吓把金口打氣，佢話抗疫係「持久戰」，大家最緊要有韌力。意思係咪大家有排做咁解呀？

林鄭今日就喺身兼醫療輔助隊總監嘅衞生署長陳漢儀，同埋醫療輔助隊參事黃英強陪同下參觀輔助隊總部。唔知點解，影片播播吓黃英強向林鄭講解嘅時候，突然加插一個職員聽電話嘅鏡頭，相當有意思呀吓。

之後當然唔少得，職員排排坐聽林鄭訓話嘅環節。林鄭話疫情已經持續咗兩個多月，「但睇嚟仲有一段時間，係持久戰，咁所以喺一個持久戰裡面，能夠可以不斷有韌力，作為一個機構、作為一支隊伍，或者作為一個個人參與，都係一啲都唔簡單」。咁又係呀，喺一個慢七拍嘅政府裏面打持久戰，莫講話韌力，心力、耐力同智力都唔少得㗎。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架