財爺鬍鬚曾民望季節性上升，超越政務司司長唐英年，兩人叮噹馬頭，令下屆特首跑馬仔估領袖遊戲添加緊張戲味。鬍鬚曾噚日聽中學生講對預算案建議時，被學生問到有冇機會更上一層樓，2012年會唔會有第二個姓曾嘅特首，鬍鬚曾就話，目前官邸只有兩層高，佢住喺二樓，要再上一層樓有實際難度。

笑言已住官邸頂樓

鬍鬚曾果然係習武多年、精通詠春嘅武林高手，面對敏感問題即時運用巧勁耍走學生。佢話自己住二樓，冇得再上一層樓固然係客觀事實，至於弦外之音，會唔會係暗指有人從中作梗，阻頭阻勢呢？佢口中所謂實際難度，好可能係有感而發。
近日城中熱話詠春一代宗師葉問生平事迹，有人話鬍鬚曾同甄子丹係同門，鬍鬚曾噚日話不敢叨光，佢雖然同丹爺識於微時，喺美國波士頓留學時有打交道，但兩人並非師兄弟，佢學虎鶴洪拳，甄子丹係北派。鬍鬚曾話習武令佢有紀律，而且識沉住氣完成工作。
武林之中有所謂「虎鶴合一，天下第一」口訣，有學生問鬍鬚曾假如有議員喺立法會向佢掟雜物，如何應變？據講詠春應用時無招無式，鬍鬚曾都話好難講如何出招接招，總之最緊要係隨機行事，笑言希望自己寶刀未老，可以接得住橫飛異物。
講到自己成個二打六咁，鬍鬚曾似乎太謙嘞，查實佢同武林仍有來往，自爆早前參加師公林祖壽宴，祝賀師公百歲大壽。林祖係黃飛鴻徒弟林世榮親姪兒，將洪拳發揚光大，喺武林甚有名望，鬍鬚曾話見到師公嚇一驚，因為自己滿頭白髮，師公白髮少過佢。

情人節睇左麟右李

武術天外有天，人外有人，鬍鬚曾要排除萬難上位，怕且仲有排打木人巷。噚日係情人節，鬍鬚曾竟然話唔記得，噚晚節目係同太太去睇《左麟右李》演唱會，佢表示唔會同太太食燭光晚餐，因為佢鍾意喺光猛地方食飯，果然係不識溫柔一介武夫。
mailto:[email protected]