我求大俠無意導人迷信,但樸茨茅夫今屆喺英超戰績令人意外之餘,前鋒簡奴暫時更以7球領先射手榜,佢日前就自爆球會成功秘訣─「賽前祈禱」!「神佑我們」真係有根有據㗎!
連同上周六主場搞掂雷丁,樸茅仍能位列聯賽「4哥」,陣中30歲嘅前尼日利亞國腳簡奴,頭、腳皆能,入球數字領先緊安祖莊臣、朗尼同杜奧巴等高價球星,佢日前就口癢透露,佢同隊波嘅走勢係上帝保佑所致!簡奴同求大俠講:「我係基督徒,平日總愛祈禱。」
原來,樸茅每日比賽前,連同簡奴,仲有包括後衞派密斯、路亞和蘇甘保等8名主力成員,會齊齊向天禱告;簡奴話齊齊同上帝傾偈呢種集體活動,令到隊波更團結,精神更集中,每次出場都打高幾皮。聽落又係有道理喎!