學生壓力過大最終輕生嘅新聞時有所聞，旁人都問係咪教育制度出了錯，已投身社會多年嘅人民力量立法會議員陳志全（慢必）噚日喺立法會討論紓緩學生壓力嘅議員議案期間，就自爆當年考試壓力大到入骨，今時今日都會不時發考試噩夢，夢見自己考唔到試，「唔知醒啦，搵唔到試場啦」，仲問在座議員同官員有冇同樣經驗，認為增加大學資助學額可減輕中學生考試壓力。

會上議員提出好多造成學生壓力爆煲嘅問題根源，包括過份着重考試、家課太多，又要求取消小三BCA等等。

中產家長唔信任傳統教育

提出議案嘅民建聯李慧琼就話唔少中產家長，都對本地傳統教育投下不信任票，安排仔女讀國際學校，提倡喺津校引入國際課程，但曾做過校長嘅教育界議員葉建源就火藥味甚重，話紓緩學生壓力唔係要提供國際課程，而係將國際學校優勝之處作本地教育改革嘅參考，仲炮轟班送仔女去讀國際學校嘅局長自己崇尚、渴望一套，又冇將呢啲優勝之處引入本地。

教育局局長楊潤雄就四両撥千斤，話香港教育制度不比海外課程輸蝕，仲話社會望子成龍嘅睇法、家長期望等都係學生壓力來源，唔贊成引入國際課程，但呢說話由兩個仔女都讀國際學校嘅楊局長講出嚟，就真係冇乜說服力囉。

李八方