各位手足︰

抗爭嘅日子已經就快9個月，首先好多謝各位嘅付出，對於近日嘅狀況，小弟有少少說話想講。

呢排我感覺到出面靜咗，但並冇因為咁而覺得自己係Condom，反而想大家可以喺呢段時間認真唞吓。呢8個幾月大家都冇停過，遊行、集會都逼爆每條路，好開心，可以喺呢段還柙嘅時間見到大家keep住行出嚟。

近排武漢肺炎爆發，喺香港越演越烈，無疑係香港政權嘅無能所致。香港「正苦」各部門道德綁架醫護，某小部份市民指罵罷工嘅醫護係黑護、係怕死嘅行為，醫護甚至要面臨被秋後算賬。試問如果醫護係怕死、係以病人嘅生命作賭注，佢哋點解要結束罷工？就係因為佢哋清楚知道自己嘅天職係救人，佢哋唔忍心其他醫護孤軍作戰，唔忍心將病人嘅生命擺埋一邊唔理，加上知道無能嘅「正苦」係唔會做嘢，所以決定重返崗位。睇報紙見到個個都抱住可能會死嘅心態返工、要影定全家福，真係叫人不禁心酸落淚。封半關無疑都係醫護罷工爭取得嚟，喺度好想對咁多位醫護講聲多謝、加油、齊上齊落！因為呢場疫症令到更多人清楚知道「林奠」嘅無能，相信民意會有更大嘅轉變。

呢段時間雖然靜咗，但小弟反而樂見呢個情況。首先喺度衷心希望各位可以專心抗疫，小弟深信抗疫係家嘅首要任務。其次小弟發現近排嘅bailout rate 高咗，甚至連爆炸品都bailout到，呢件事真係振奮人心！隨着集會遊行減少，「重犯機會低」可以成為較有用嘅辯詞，相信未來嘅日子可以有更多手足bailout到。

對於香港係一個「法治」社會，小弟有所保留。小弟認為家嘅香港係一個「政治」社會，因為與執法者抱住相同嘅政見，而唔使面對法律制裁嘅事比比皆是。法治嘅精神係人人平等，上至行政長官，下至平民百姓。雖然我哋深知呢個世界冇絕對嘅公平，只有相對嘅公平，但當執法者都只係抱住「只處理與自己政見不同嘅人」嘅時候，可見香港真係「法治已死」。隨着越來越多case被撤控，更顯出警察濫捕嘅問題。法庭嘅案件堆積如山，法官能否以公正嘅角度去處理每個案件都成疑。法官都係人，都有睇新聞，有政治立場，佢哋能否喺審理案件嘅時候抱住中立嘅態度又係個問題。

經過八個幾月嘅時間，相信大家都知警察嘅執法原則係乜，咁呢度就唔多講。但有樣嘢希望大家都要知，就係控方會不斷以不同嘅理由拖延，包括證物未完成檢驗、搵緊新證據、相信有同案在逃等等等等。務求做到「嘥你時間」，就算最終定唔到你罪都要你還柙幾個月。喺我身邊有位手足還柙咗四個月，其間多次保釋被拒，控方一直以「搵緊更多證據」作理由反對手足保釋；法官則以「重犯機會率高」及「相信案件會於短期內判刑」作理由拒絕手足保釋申請。最終嗰位手足被判入RC (更新中心)，刑期約四個月，被判入RC即係代表還柙嘅日子係白坐，而且控方喺最後一庭都冇新證據，可見控方不斷押後及反對手足保釋嘅手法係極為可恥。

最後喺度作個總結，小弟希望大家可以專心抗疫。對於出面「靜咗」，小弟並冇半點怨言，同時希望各位喺抗疫嘅時候，謹記呢場運動其中一個宗旨──fact check每件事，唔好俾人帶錯風向。除咗遊行集會，其實仲有好多和理非嘅活動 / 行動等住大家做，「兄弟爬山，各自努力」，每個position都同樣重要，希望大家可以多啲着眼於各層面嘅抗爭，務求做到全面性。

祝 身體健康

0.03 Condom仔@PUCI
2020年2月25日

（編按：此為工黨立法會議員張超雄收到被還柙手足的公開信，由張超雄代為投稿。如有意回信，請寄到「中區立法會道一號立法會綜合大樓1017室張超雄立法會議員辦事處」，註明回覆給哪位手足，以及留低電話號碼或其他聯絡方法，方便議辦跟進。）

【蘋果論壇： https://hk.appledaily.com/column/onlineforum，投稿網上論壇可電郵到[email protected]】