【新增周元入伍圖片及內容】

現年29歲嘅韓國男星周元將於今日晏晝以現役兵身份入伍，預計於2019年2月退伍。雖然周元入伍在即，但佢同女友BoA就各有各忙，未能喺入伍前見多幾面，不過今日就有媒體爆料，指周元同BoA本月初亦有爭取時間見面，同遊日本。

據韓媒《東亞體育》報道，周元為咗宣傳新劇古裝版《我的野蠻女友》，而BoA就為咗日本巡迴演唱會，兩人於本月4號經韓國金浦機場前往日本東京，報道指雖然兩人搭同一班機但分開坐，所以冇人留意到，而兩人亦趁機會喺日本甜蜜約會。

隨後周元所屬事務所回應表示：「對於周元同BoA喺日本約會一事，係藝人嘅私生活所以難以透露，但並非搭同一班機。」

於韓國時間晏晝1點45分左右，戴住帽嘅周元現身江原道鐵原郡嘅新兵訓練所，將進行為期6周嘅基礎訓練。雖然周元打算低調入伍，但當佢見到有粉絲送行時，亦親民地逐一同粉絲握手打招呼。