孫耀威（老孫）早前宣布同陳美詩（Macy）喺美國秘密註冊（新聞連結： http://bit.ly/2qLQpTO ），噚晚11點幾，佢哋兩公婆到九龍灣金利來小廚平民餐館醫肚，同行仲有音樂人郭熾賢（前樂隊幕後玩家成員），3人叫咗幾味小菜，其中一味有蝦，大約40分鐘便食完，食唔晒嘅餸菜更打包走，惜食抵讚。

老孫接受《蘋果》電話訪問表示：「我哋頭先喺studio做嘢，到夜晚11點幾都未食晚飯，咁咪喺studio樓下飯館食飯，成日都幫襯呢間，雖然冇乜裝修，但食物新鮮好味，成日都去㗎。咁犀利啲讀者，去到澳洲又畀人影到，去到九龍灣又畀人影到，佢哋太犀利啦。」

原來有老婆陪開工，問到新婚生活係咪好sweet？老孫冧爆表示：「冇錯，Macy當晚陪我，因為我已經好攰，佢精神上支持我，哈哈！新婚生活都係咁，其實都一樣，今晚搞好隻歌，因為明日去《勁歌優秀選》，都係如常工作，多謝關心。」至於同枱食飯係音樂人郭熾賢，老孫話：「佢係我哋嗰首《It's My Day》嘅編曲同監製。」

講番呢間金利來小廚，日頭係普通茶餐廳，夜晚變身小炒、食海鮮嘅小菜館，最啱成班人一齊擦，farewell飯局又得，生日飯局又得。話梅骨juicy肉汁多，酥炸鹹豬手酥脆一流，蠔仔粥超多蠔，椒鹽粟米亦係必食。最正仲係佢開到好夜！