前文提到，63歲嘅夏韶聲宣佈去年7月已經第四度離婚、同越南華僑兼富家千金Tina結束8年婚姻。夏韶聲接受周刊訪問時直認女方太黐身，令佢大感吃不消；仲話女方生於溫室，視野狹窄云云。期間夏韶聲亦不禁歎謂結婚始終都係應該竹門對竹門。咁多先天不足嘅條件下，似乎兩人今次婚變，真係無可避免，亦無法挽回。

夏韶聲於訪問中亦透露了不少佢嘅「金絲雀」一樣嘅生活，仲話自己真係受不了。包括話，女方當年一擲約港幣千六萬，喺美國買咗一間豪宅，為兩人的愛巢。

講得係豪宅，究竟幾豪？四萬呎，連花園，獨立屋，仲有馬圈，兼夾有泳池，仲可以對住個泳池作歌錄音。當年夏韶聲亦不否認生活開支都係靠老婆「照顧」。除咗日常所需，Tina仲一擲百幾萬，買咗套名鼓俾佢做玩具。

夏韶聲接受周刊訪問時話，佢受不了呢種金絲雀一樣嘅生活:「我唔可以匿喺個金雀籠入面，我唔係食呢啲飯嘅人。」

有個富家千金老婆，本來可以做駙馬爺生活無憂，但夏韶聲話佢唔想咁樣，故此即使離婚，亦一毫子身家都冇攞過。「我唔分佢家產，佢亦冇嘢分俾我，因為婚前我哋簽好晒協議。」

有四萬呎獨立屋唔住，變番寡佬之後嘅夏韶聲返港住幾百呎村屋，又表示自己嘅經濟係由零再開始:「但冇問題，有時發夢都會見番間豪宅，因為嗰間始終係我dreamhouse。(略)要人啲嘢好麻煩，我寧願要自由。」