大陸真人騷節目《爸爸去哪兒5》正在熱播，除咗躁爸陳小春對囝囝Jasper發脾四成為熱話，吳尊嘅暖爸表現都好受觀眾關注，尤其喺最新一集中，吳尊因為要同其他爸爸出海捕魚，暫時離開一對子女幾粒鐘，其間收到6歲囡囡NeiNei電話喊住講：「爸爸你能現在回來嗎？」事後吳尊喺微博表示：「真的很愧疚！」

日前暖爸吳尊帶囡囡NeiNei同囝囝Max現身香港機場禁區，被讀者李先生透過「爆相爆片」分享，李先生喺電話表示：「嗰日下晝2點幾，吳尊同兩名子女係喺機場內嘅迪士尼店購物，同行有一名粉紅色衫女子，唔知係咪佢老婆，仲有位白色衫姐姐就疑似工人，佢哋買完迪士尼再去睇太陽眼鏡，吳尊抱起囝囝晒父愛。」

從相片所見，吳尊戴咗cap帽同巨口罩，完全將個樣密封晒，讀者話：「吳尊好低調，全程頭耷耷咁行，我認得佢因為有睇《爸爸去哪兒》，係認到佢對仔女先，再見到個老竇戴晒口罩，加埋條腿嘅紋身知佢係吳尊。其間有人同佢囡囡say hello，估計都係有睇《爸爸去哪兒》，本來佢囡囡冇反應，吳尊就用國語叫佢要同人打招呼，好有禮貌。」

而吳尊嘅初戀老婆林麗瑩一直好低調，之前喺《爸》節目都係得個背脊出鏡，但仍然打入微博熱搜榜冠軍，呢日難得見到佢真身，全程好有耐性陪住子女揀公仔，表現出母愛。李先生仲話：「佢哋喺迪士尼店買咗好多嘢，一對子女都冇扭計，表現好乖，之後佢哋行去Ray-Ban時，吳尊仲抱起兒子，充滿父愛。」