30年前劉兆佳已經日講夜講香港政治人才貧乏，30年後振英要為香港建立政治人才庫，大量招攬政治助理，以身作則，將一個助理位分畀三個助手，先行一步。特區政治人才貧乏，一如香港足球，人人都知水平低，人人都媽，但冇人識搞，而且越係搞就越係差。
政治人才貧乏首先要睇大環境，97前乃英治殖民地，本土政治人冇發展機會。二三流英國鬼來到殖民地已經殺晒，華人政客只係點綴，麥理浩年代開始本土化，兩局議員吸納本地商界專業精英，但做兩局議員不是政治精英，本質上只係買辦，在暴動後幫英國實行就地而治，以華制華。英國直至撤出香港一刻，都冇同呢班所謂香港政治人分享決策權力。而自85年實行代議政制改革，只係一套諮詢式假民主，權力仍牢牢掌握在行政機關手上。正如一班球員出自修頓小型球場，畀到兩腳波就自封為灣仔史高斯，但從未真正踢過職業賽，點能夠成為專業球員，根本連心態上都冇專業要求。

97後北京因利成便，繼承了英國人呢套諮詢式假民主，實質行政獨裁制度，以為只係換個Patron，換支旗就照樣運作。殊不知行政主導體制同英國殖民地管治一套施政價值信念，高度結合在一起，出發點是避免英聯邦成為倫敦沉重財政負擔。例如保守公共理財、循序漸進式決策、自由巿場等，殖民地管治從來不需要大藍圖、大有為，因為即使係港督，只不過是殖民地事務部、外交部一個公務員而已！
但97後北京與香港新貴均希望洗脫殖民地陣味，要大有為，要有國家視野，要有國際戰略思維，要有宏觀思維，於是當日吹捧殖民地行政主導體制變了施政攔路虎，陳方安生乃代表人物。董連任後自組班底，實行政治問責制，擺脫公務員掣肘，結果政爭不絕，自己也黯然下台。往後七年曾蔭權謹小慎微，意圖討好各方，北京在特區實施擴大問責制本是為了建立治港幹部團隊，他卻沿用選任政務官方式，任用了一班冇政治能量，但又冇殺傷力的副局政助，以圖平息政務官系統不滿，瞞天過海。

振英要完成老董壯志，選拔大量政助入政府，假如又係近親繁殖，親疏有別，起用工聯民建聯區佬或冇足夠政治歷練者入政府，只會再開啟新一輪政爭。講到底，政府不是再培訓局，所謂人才若欠缺獨立政治思考、政治論述能力，加上司局長又欠執政集體信念，拉雜成軍，試問又如何可以變成執政人才呢？
添馬男