【爆相爆片】吳千語與林峯愛到難捨難離，經常出雙入對，一有長假期就會飛往外地度假兼「濕平」。大前日讀者Chris經本報「爆相爆片」，分享兩人由外地返港在香港機場行李認領大堂的照片，見戴黑超的千語BB紮起頭髮，林峯則反戴cap帽及黑色口罩在等行李，Chris表示沒有太多人認出他們。
從他們的行李當中，見到大袋小袋戰利品及一個雙色的RIMOWA行李篋，相信此行濕平又是滿載而歸，他們在現場整理了一輪行李後離開。

同李敏鎬茶敍

昨日千語BB出席在澳門舉行的時裝品牌活動，她接受訪問時承認與峯峯出埠旅行，她說：「去韓國幫新片《賞金獵人》試造型同見韓國演員。阿峯就去拍MV，所以之後再一齊去法國度假。」千語BB笑言只是時間巧合，而不是林峯怕自己與《賞》劇的韓星李敏鎬傳緋聞才做跟得男友，她又言今次到韓國較少外出，最多是和韓國演員茶敍，她說：「當地好興咁樣聯誼，李敏鎬都有出席，阿峯冇嚟。喺韓國阿峯同班朋友出去飲嘢，我都有跟埋去。」之後二人轉飛法國，主要是參觀當地美術展順道購物，主打陶瓷，千語BB強調自己出錢買：「自己個份自己畀，酒店又有贊助。唔驚人哋話我使阿峯錢，我俾人話，好過男人俾人話使女人錢。男仔自尊心強啲，我就冇所謂。」千語BB透露已儲夠首期買樓，她說：「不過想畀多啲首期，所以仲會儲多一兩年，唔會接受阿峯買樓畀我，除非結婚。因為買樓過程係一個奮鬥嘅目標。」
採訪：盧妹