昨日本欄提及最近適宜用股票期權應市，其實自己一直都好少提倡，有如此行動原因好簡單，就係中央教大家咁做。中央以一句「積極穩健，審慎靈活」為來年宏觀經濟政策定調，整句說話工整對稱，如果放上天秤都唔會有絲毫顫動，有保有壓下，大市想大跌難，但要升亦唔容易，所以同時沽空認沽期權及認購期權，成為悶市中適用的策略。
近日大市逢開高就低收，開低就高收，行完等於冇行，成交又持續減少，相信到做冬前都好難有突破。人行行長周小川都話現時陷於兩難局面，一方面要壓制通脹，一方面又怕引來熱錢，所以大市都有類似現象，繼續浮沉。
現階段要睇實有哪些個股趁悶市中突破，因這批股票之後的表現通常比較出色，不過始終臨近年尾，粉飾櫥窗效應唔可以忽視。

股市長遠跑贏樓市

有黑心人話有部份表現麻麻的基金經理，喜在此段時間換馬，將基金的十大持股全部換成一些升勢亮麗的股票，令投資者感覺上個基金做得不錯，尤其今年大價股表現普通，而好多時基金的十大持股總有一些大股傍身，所以今年會多一點類似情況。因此，最近持續上升的股票，單睇這個月未必可以作準，但如果在下個月依然向上，便要打醒十二分精神，因它們隨時是明年之星。
除了股票之外，近日見傳媒報道紛紛話樓市見底，市場已消化壞消息。對此筆者不太認同，因為上次打壓樓市消息太突然，應尚有炒家未來得及散貨，投資講求回報，現時措施變相要投資者持貨兩年，諸多限制，相反股票既靈活，又可以間接參與商舖及寫字樓的收租、代理等生意，士佳唔敢講樓市會唔會升，但相信股票會跑贏。
當然，只係跑贏冇用，因為樓市有槓桿，不過長遠計，即使計及槓桿元素，我都認為股票會跑贏3倍有多。

張士佳
寶來證券（香港）董事　投資服務部
mailto:[email protected]