何韻詩連日嚟都有去金鐘政總現場，支持一班市民及學生，而今日阿詩及黃耀明，同樣喺facebook（fb）貼咗多張現場環境相，以及轉發相關報道，佢哋同樣喺fb留言發聲。

今早阿詩影咗一班自稱愛護香港嘅「愛港力」人士，高舉「愛香港愛和平」嘅橫額，而阿詩就話：「一邊警察清場，同時另一邊愛港力踩場，真係有緣。」

之後警方就話要清理障礙物，阿詩就話：「清場咪清場囉，講咩唔係清場，警察都學埋曬(晒)d(啲)語言偽術，羞家。」阿詩再貼咗張金鐘嘅現場相，就話：「金鐘道100多人坐下。」

而大台首席體育記者及主播伍家謙，亦喺fb留言寸爆警方玩「語言偽術」：「我嘅目的唔係遲到，只係想晏少少返；我嘅目的唔係食嘢，只係想將食物放入囗再呑落肚消化；我嘅目的唔係出貓，只係想考試時拎本書出嚟睇下D答案。」相當啜核﹗

至於DJ林盛斌（Bob）亦受「清除障礙物」同「清場」困擾，佢喺fb寫道：「呢兩個詞語有乜嘢分別？有冇通識或者中文科老師可以麻煩解答到我，真心想知！四點鐘許sir，麻煩你，等陣四點鐘話一話我知，唔該！」不過許Sir已經解答咗，話警方清除障礙物行動係光明磊落，唔知Bob滿唔滿意呢個答案呢？

另外，明哥亦留守喺金鐘，今日佢同阿詩都一樣，貼咗好多金鐘現場嘅相，其中一張相中有好多警察，明哥就話：「太古廣場外有點緊張。」噚晚佢亦貼咗張與岑建勳及劉天蘭合照。