喺食肆見到老鼠,唔知食客仲有冇胃口食嘢呢?有讀者報料,分別喺天水圍同青衣嘅食店見到老鼠喺店內竄嚟竄去,但當時兩間食肆在場人士反應大不同,有人立即出手捉老鼠,亦有人當自己時運高睇唔到,真係千奇百趣。
謝小姐同小記講,上星期五(13日)夜晚7點左右,喺天水圍天慈商場大家樂分店準備食晚飯,其間發現一隻有大人手掌咁大嘅老鼠,喺店入面慌失失咁到處亂竄,當時有廚房職員見到咁嘅情景,即刻走上前踩住老鼠條尾,令佢走唔到,然後即刻用個白色膠袋笠住佢執走,幾分鐘之內就清理現場,過程非常利落,其間在場食客好冷靜,冇人咿嘩鬼叫。