禮拜日尾場隻「貝連利」同埋應屆馬王「軍事出擊」，馬房唔相同，馬主方面一個係趙容燮，另一個係羅傑承，好似大纜都扯唔埋，但其實呢對馬關係好親密。
原來「貝連利」嘅外祖母，當年生咗「軍事出擊」，換句話講「貝連利」嘅舅父就係「軍事出擊」啦，而「貝連利」就係外甥。
咁唔怪之得「貝連利」上次忽然咁勁啦，母線血統咁好，唔多唔少遺傳到戰鬥力，而且彼此路程性能都係長好過短。「貝連利」上場增程初跑1400米，直路初近乎包尾，點知追下近啲，追吓又近啲，最後大勝兩個半馬位，嘩，咁贏法潛質好驚人啫！
今次佢升上三班跑，表面上對手強咗，不過一來復課操練充足，二來負磅亦大減，最重要嘅係佢作為「軍事出擊」嘅外甥，唔好話多，有舅父七成功力，三班都掃晒啦，升班使乜驚呀！