禮拜日沙田八草兩泥賽事，草地用C加3跑道，由於跑道狹窄，所以呢條跑道一向對前置馬有利，以最近3月21日賽事為例，當日過半數頭馬守前四位入直路建功，其中「御鋒」及「陽明囍囍」都係用見習生一放到底，另外「添丁發財」及「金剛仔」守貼欄包廂位贏馬，留得太後好難追。
今戰列陣馬中，第四場「添丁發財」上仗正是在3月21日跑田C加3欄贏馬，贏完等番同一移欄先再跑，有機會再替馬房建功。另外，尾場「金碧陽光」快放馬用黃皓楠減磅兼排一檔，結合跑道形勢隨時可以一放到底。
至於泥地方面，馬會曾於周二進行翻土工程，預計跑道狀況與3月21日賽事相同，當日兩場泥地頭馬「福盃滿賞」及「榮光大道」都係跟守前領馬之後位置競跑，第六場「紅褲仔」及第八場「信眼光」呢類具前速兼排內檔嘅馬可以優先留意。