【吳君麗逝世】錄影中途驚聞麗姐離世 薛家燕:佢係一個好好嘅前輩
薛家燕李居明吳君麗
粵劇名伶吳君麗(麗姐)昨日黃昏傳出死訊,其後吳君麗的妹妹在晚上透過治喪委員會向傳媒發訃告,麗姐於26日黃昏安詳辭世,享年84歲,喪禮詳情容後公佈。從童星時候已經與麗姐合作的薛家燕,昨晚在電視城錄影節目,中途已經接獲麗姐的死訊,其後她接受《蘋果》訪問,回憶當年與麗姐的相處軼事,她不停哽咽、傷感說:「今晚拍《流行經典50年》,拍到一半接到麗姐去世消息,我當時好愕然,因為中秋節嗰日我仲有傳短訊佢同佢好朋友MiMi,祝佢哋中秋節快樂,MiMi覆我,諗住麗姐有接到我訊息。」
家燕姐還說:「唔知係咪嗰時佢病緊,我真係唔知,但我真係好難過,想喊出嚟,因為麗姐睇住我大,我入行冇耐就同佢拍電影,唉,佢好錫我,對我好好,我個仔結婚請佢飲,佢話一定嚟,仲話好開心見到我個仔大,所以知佢走,好難過,想喊出嚟,但要做節目冇辦法,麗姐係一個好好前輩,對電影粵劇有好大貢獻,佢嘅離開入真係好難過,佢好慈祥,臉孔永遠留喺我腦海中,一直好深,好好教導我哋,唔識點講,希望祝麗姐一路好走!」
近年熱衷搞粵劇的李居明,對於麗姐的離世,他回覆《蘋果》:「有關麗姐離世,非常哀傷,今晚新光演出謝幕,我都取消咗,非常難過。我父親係麗姐典型粉絲,手袋擺咗麗姐嘅照片超過60年,麗姐出道開始追隨,房間都放經典照片,直至離開,我都係睇住麗姐啲嘢長大。」
李居明還說:「80年代見到麗姐真人,感受佢嘅親切,88年8月8號,麗姐同逑姐去日本參加我一個禮佛團,我之後有幫佢睇過風水,我喺新光搞戲,麗姐都成日嚟睇戲,讚賞同鼓勵我,我當佢好似媽媽一樣咁親近,佢好愛錫我哋呢啲子姪,過世前幾年都有見到,今日聽到好難過。」