政圈近日傳出創立民協嘅馮檢基有意退黨，不過馮檢基連日以來都無否認傳聞，只透過短訊回覆：「消息都說是流傳，故不答」。
有民協中人證實馮有退意，但黨內正極力挽留。沉默多日，馮檢基昨日向各傳媒發出採訪通告，指「去向受到傳媒朋友關注」，會舉行傳媒茶敍透露現時工作情況。據了解，馮今日會開記招宣佈成立新平台，但暫時唔會退黨。

7月出書轟泛民

有關馮檢基退黨嘅傳言滿天飛，有民協中人承認已經知悉馮有意退出民協，成立新壓力團體，同時已聯絡部份前民協區議員加入；亦有前民協區議員證實馮邀請佢加入新平台。馮曾經向黨友透露，退黨係因為7月發行嘅新書將會炮轟泛民，為免影響民協同泛民關係，佢自行退黨，黨友們雖然半信半疑，但都有極力挽留。
不過最多人流傳，馮檢基退黨嘅最大目的，係為即將舉行嘅立法會九龍西補選鋪路喎!
以上傳聞連日得不到證實，因為馮檢基至今未作正面回應。民協主席施德來早前就指，中委會未有收到任何人嘅退黨申請。究竟馮檢基會唔會同民協分手？消息話今日應該唔會講，但成立新平台一事就勢在必行㗎喇。

李八方