八方噚日見到榮升十大最受歡迎議員之首嘅余若薇，Audrey前晚睇咗政治諷刺劇《東宮．西宮》，講開話個劇名幾得意，原來套劇嘅導演之一胡恩威同八方一樣，好鍾意美國電視連續劇《白宮群英》，八方多口問Audrey，點解香港嘅領導連美國電視劇嘅總統都不如，Audrey瞪大眼話：「答案好明顯啦！人哋入得白宮都係身經百戰，香港嘅特首只需八百人選出嚟。」

女兒怪責衝紅燈
講政治Audrey好理性，但講佢嗰三個寶貝女就興奮得多。原來Audrey啱啱同三位千金去完新西蘭滑雪，佢自己滑雪技術麻麻，揀難度最低嘅滑道，依然喺斜坡前煞唔住掣碌低，搞到身上多處瘀傷。
Audrey噚日去到一個中學生組織成立大會，同中學生講起仔女對父母嘅影響，自爆成日見馬路冇車就衝紅燈，都係十歲嘅女兒一句怪責：「媽咪，先生話咁樣唔啱！」Audrey先改咗呢個壞習慣。
姊弟同心，Audrey位細佬、同樣係資深大律師嘅余若海，噚日出席咗另一個學生活動，提到家姐咁威成為最受歡迎議員，佢好戥家姐開心，話Audrey搞嗰樣嘢（應該係指反23條）都咁多人支持真係唔容易，重替家姐多謝支持佢嘅市民。余若海話雖然家姐咁威，但佢自己就冇打算學家姐咁從政。


傳真︰2623-9278
電郵︰[email protected]