闊別烏拉圭國家隊636日後，蘇亞雷斯回歸！阿蘇喺前年巴西世盃咬咗基亞連尼一啖，國際賽停賽九場，家陣佢終於捱完個停賽令，會喺禮拜五作客對巴西場世盃外復出，我求大俠希望阿蘇生生性性，唔好再殭屍上身、走去咬人。
不知不覺，離開巴西世盃都近兩年，阿蘇周五終於可以踢國際賽，喺世盃外作客對巴西，佢已經返咗去烏拉圭報到，同隊友練波。
喺記者會上，阿蘇好多謝一班隊友喺佢停賽期間嘅努力，講得非常客氣，「國家隊唔係依賴某個球星，而係靠團隊嘅合作，所以呢次復出，我感受唔到有任何壓力。喺美洲盃，烏拉圭踢得好好，外界都話烏拉圭冇咗我唔掂，傷害咗球隊嘅尊嚴，激發咗大家嘅鬥志，由高甸到卡雲尼，我睇到所有隊友都團結一致。我返到嚟，只係為團隊再加一分綿力。」烏拉圭喺舊年夏天美洲盃輸咗畀智利0:1，八強出局。

教練諗計唔畀再咬

一不離二，二不離三，傳媒都關心，烏拉圭國家隊怕唔怕阿蘇又咬人！教練泰巴利斯就話，球隊會營造一個環境等阿蘇專心踢波，「我哋要阿蘇個腦淨係諗足球，其他嘢唔諗得，我哋會幫佢隔絕所有干擾，等佢保持平靜嘅心境，仲會多同阿蘇傾偈。至少確保佢唔再咬人。」
烏拉圭喺世盃外成績唔錯，四戰三勝一負，以九分排緊第二位，壓住周五嘅對手巴西㖭！踢緊中超山東魯能嘅巴西中堅基爾拿斯文圖都話怕咗阿蘇，「真係冇辦法可以擋到阿蘇，佢係一個好出色嘅射手。我哋嘅焦點唔係放喺限制某個球員上，而係要限制佢哋全隊。」