向海嵐（Anne）同陳嘉容（Eunis）今日喺中環，各自為自家品牌舉行開幕派對，邀請咗一班好友包括余安安、利嘉兒（Lily）、歐陽妙芝、陳爽同何國鉦等出席。

Anne以千萬投資珠寶店，佢笑話：「我已經將老本同埋嫁妝攞晒出嚟，希望可以做到退休，因為珠寶生意都好多開支，我就希望一年半可以回本，可以有錢分，第一次開珠寶店，喺大半年前已經籌備，5月正式做生意，女仔都鍾意珠寶，可以將呢份愛傳承開去，自己都有參與設計，有朋友已經買咗，要開始不斷叫朋友買。」問到Anne搞生意邊有時間拍拖？佢笑話：「嫁妝老本揼晒落嚟，日日同間舖談情，晚晚做到12點、1點，因為未做過珠寶，唔想只係掛名，o依家連mark價錢都係自己寫嘅，要親力親為。」

同時榮升老闆娘嘅Eunis就透露以近百萬投資cashmere服裝生意，首次做生意，Eunis話好開心同有新鮮感，仲話希望將自家服裝帶到唔同嘅年齡層。

另外，Lily就話向來都冇儲珠寶嘅習慣，但係自囡囡出世後就改觀，佢目標係一個月儲一粒金，既可保值又可留念，提到囡囡嘅百日宴，Lily話：「其實佢未出世已經開始諗，百日宴臨近聖誕，好多人唔喺香港，加上我同老公嘅朋友比較多，都預會請幾百人，好似婚禮咁，係好攰嘅一件事，o依家諗住百日嘅時候同家人慶祝先，等囡囡一歲左右，就請晒所有朋友再慶祝。」囡囡兩個幾月大，Lily話到o依家都仲未習慣，又遇到情緒問題，佢話：「我嘅產後情緒波動得比較大，越愛就越多擔心，會擔心佢嘅將來，又會諗陪月走咗，自己照顧得唔好，好冇安全感，但係我會自我調節，自己同自己傾，可以克服到。」

精選娛聞，喺晒《娛果》
http://fb.com/appledailyent