八方報喜！呢輪除咗多人有BB外，亦有唔少人搵到另一半。最新鮮熱辣一單係鍾逸傑（SirDavidAkers-Jones），八方聽聞鍾Sir有第二春，而且好快拉埋天窗，於是問佢啲契仔契女以及新界鄉紳，佢哋都話已有所聞，君不見，今年79歲高齡嘅鍾叔最近紅粉緋緋，正所謂人逢喜事精神爽也好事近。
政改方案鬧到㷫烚烚，陳太、煲呔同葉劉互不相讓，其實佢哋都係港英時代一手培養嘅精英，佢哋位大師傅就係鍾逸傑，見到此情此景，師傅都唔知幫邊個好？若然開口，煲呔又話退休人士多嘴，咁最好就係唔講咁多。世事紛擾，不如搵啲開心嘢沖喜吓好過。

可享用爵士夫人尊銜

聽聞呢位令鍾叔傾心嘅女士係瑪麗醫院醫生，本來為鍾叔醫病，唔知係咪因此而結緣。鍾叔自從2002年愛妻Jane（鍾紫燕）因病辭世，一直悶悶不樂，有時去澳洲探吓個女，更多時間就喺香港同啲朋友聊天度日。冇咗另一半喺身邊，當然寂寞。舊年就有人話鍾叔想續弦，四出拜託朋友介紹，仲好坦白話嫁畀佢嘅女士，可以享用爵士夫人嘅尊銜，其實愛情咁偉大，銜頭算得乜。
事隔一年，佢啲好朋友紛紛收到喜訊，話佢搵到心上人，大家準備做人情。鍾逸傑雖然係英國人，但以香港為家，退休之後同太太住喺青龍頭，本來優哉游哉，點知97後特區政府收地擴路，搞到佢兩老要臨老搬屋，去咗港島陽明山莊住。最近又搬咗去堅尼地道，大概係覓得新愛巢，迎娶醫生太太。
八方識鍾叔好耐，知佢老人家搵到個伴，都為佢高興，恭喜恭喜！