上周六（17日）沙田日賽舉行時，沙圈未見蘇保羅的踪影，原來這位新西蘭籍練馬師已經飛返家鄉，與家人迎接聖誕佳節。話雖如此，現今科技發達，練馬師即使身在外地，亦可遙控管理馬房日常運作，實際影響並不大，而上次日賽蘇廐亦有「再開心」贏馬呢！

踏入季中階段，作風慢熱的蘇保羅成績亦見穩步上揚，今個月出馬29次，取得3冠4亞3季，當中10倍以下的實力馬，上名率更接近五成。本周四谷草夜賽，蘇廐出馬依然踴躍，派遣七駒上陣，由六位不同的外籍騎師策騎，連場入圍絕不出奇，除了第三場的「越跑越好」外，第四場「連利進寶」改配郭能，亦必需重視。

第四場四班1200米，「連利進寶」上仗跑同程輸三馬位得第七，當晚沿途走外叠，鞍上人羅理雅在直路只打了五鞭，騎法不夠積極，未有完全發揮馬匹的實力，加上嗰場前中段步速偏慢，後上馬形勢吃虧，落敗合情合理，敗績咪當真。

此駒上季在三班曾經兩度入圍，跑四班賽可賺級數，今次同場對手之中，只有「星際武士」季內在四班贏過，水準仲低過上仗。再者今場改由郭能策騎，發揮馬匹後勁更加硬淨，若然能夠交出馬匹的真正實力，屬穩位望贏的爭勝要角，值得再跟進一次。